عصفورين بحجرة

عيّاش ليوم داخل بعضو. عندو قضية أكيدة في وسط البلاد لازم يقوملها بكري. قام موخر و خرج يجري حتى أوراقو نساهم. عياش مواطن صالح ما ياخو" الترنسبور بوبليك" كان ما يخلص أما ما فيها باس كان يقص سوم آري و يهبط في "الترمنيس". وقف عيّاش عالخلاص وطلب" تيكي" بـــ 300مي. ياخي السيد قالو كمل عشرين مليم و عيّاش مافيبالوش بالزيادة و ما عندوش صرف لا هو لا الخلاص. الحاصل لحمت بيناتهم وتنازل عيّاش على شوية من وطنيتو و طلع "مرسكي". أما وهو في "المترو" أنبو ضميرو و قرر باش يرجع اعتبار و طنيتو و يهبط يقص في المحطة الجاية. وهو هابط يلقو روحو قدام "كونترولار" وطني هو زادة. و سي عيّاش بلا هويــــــة الحاصل لحمت بيناتهم أما المرة هذي عيّاش ما تنازلش و كان وطني و احترم القانون و مشى مع "الكونترولار" للمركز. غاديك فرحو بيه الجماعة بالعمل حشموه بحسن أخلاقهم و كرمهم آش خلاه خرج وجهو أحمر. قرر عيّاش باش يلغي "الرونديفو" و يتعدى يخدم "ديجا" الوقت معادش يكفيه. ما تو يقلو صبح مريض و الا يشوفلو أي حكاية. دخل عيّاش للقهوة يلقاها ساكتة ما هيش عاويدهم "كليوناتو" يقعدو ساكتين. هز راسو لتلفزة خبر عاجل عالجزيرة ماكله بعضها في جنوب لبنان. جبد عيّاش كرسي و قعد و تلمت عليه العباد و بدا يحلل وسخن في الحديث و نسى روحو و دورها اجتماع عام و العباد تهلل و تكبر و عياش يمجد فالمقاومة. وخرج مالجنوب اللبناني لفلسطين و تحولت القعدة لنقاش على واقع النضال العربي. و عيّاش في أمور كيما هاذي عندو ما يحكي. وهو هكاك و يشوف كرهبة عرفو داخلة "للباركينغ" نقز من بلاسطو 'ايا كحلة اكبس روحك و حيدة جيراك و زوز تاي و أنت زرقة شوفنا روتانا كليب يزينا مالكبي يا خويا ربي معاهم خلينا نحلوا مشاكلنا أحنا الساعة' و رجعت القهوة تغلي كالعادة بين المكشخة و النبارة و عيّاش كالعادة سيد الموقف . دخل عرفو كشاكشو طالعة ' ماكش باش تبطلي القعدة مع الكليونات و الحديث في السياسة أخطانا يا خويا خلينا ناكلو خبزة آش دخلنا يا خويا فخار يكسر بعضو' جبدو عيّاش على شيرة و تمتملو 'يزي يا عرفي آنا هكه نعاون في الحكومة أما خير نلمهم هنا والا يخرجا للشارع و يدخلوها بعضها و فوق هذا و كلو الي باش يشرب قهوة يولي يشرب زوز و هكه نضربو عصفورين بحجرة' تلفتلو عرفو وقالو 'يا ولدي معلم مالصغرة و انت هكه ما يقدك حد أيه جيبلي قهوتي و أنت يـــا زرقة دورنه للجزيرة و أخطانا مالهموم الي اتبعلي فيهم'.

و هكه استعاد عيّاش سيطرتو عالموقف و واصل مسيرتو النضالية وطنيا و قوميا 'عصفورين بحجرة و بالكشي بالبوربوار يوليو ثلاثة' وهكه يكون مرك نهارو...