حكاية عيّاش 2

عيّاش  قرا الابتدائي و الثناوي والجامعة. عيّاش اليوم قاص أبونمون في قهوة الحومة  نهار يخلص و عشرة يخلصوا عليه و سعات يكردي . عيّاش يتابع في أخبار التشغيل أول بأول الحاصل في القهوة يعرفوه الكل الجديد الكل عندو من مناظرات و انتدبات و عروض و تعيينات و قروض و مشاريع و منظومات تي الحاصل عيّاش مكتب تشغيل متنقل أو بالأحرى في القهوة عيّاش صاحب تجربة و خبرة يفهم في كل شيء و يخدم كل شيء الا حاجة وحدة ما نجمش ينجح فيها هو انو يكون صاحب اختصاص بالرغم انو يملك شهادة اختصاص

عيّاش عندو صاحبو مسلكها صاحب أفريات يشري و يبيع وراس المال يكبر الحاصل شرى قهوة الحومة و اقترح على عيّاش يخدم عندو و عطاه 50 دينار زايدة على بقية الخدامة موش على قرايتو أما لخاطرو عامل عليه برشة مزايا أيمات لقراية تنجم تقول هذاك خلاص الفوسكات الي عداهملو أما الله غالب صاحبوا بطل القراية بكري ولا راو عيّاش دبر 50 أخرى

عيّاش عندو صاحبو آخر أما هذا قاري مليح و مسلكها زادة لخاطروا عامل سبور متراني معناها و كتافو عراض و مليانين هوك سعات كي يشرب قهيوة يخليلو هاك الـ50 مي وراس الشهر يخلي 100مي كاملة

والبقية كيفو عيّاشة أما كليونات عندو في القهوة فيهم الي تهموا عروض الشغل و فيهم الي يشري الجريدة باش يقرة حظو و الا صفحة الحوادث 

عيّاش اليوم أكثر واحد فاهم في القهوة يحلل في الرياضة و الدين و في السياسة زادة , الحاصل سكر بيرو التشغيل و تفاضى لتنبير